Landsstýrismaðurin í fíggjarmálum vil hava greiðari karmar um innkeyp hjá kommununum, men tekur ikki undir við at lóggeva um útboð. Hann leggur heldur upp til vegleiðing og ein innkeypspolitikk í hvørjari kommunu.

Hetta er svarið til Kappingareftirlitið, sum í apríl mælti til lógarfestar útboðsreglur. Ein spurnakanning vísti, at fleiri høvdu varhugan av, at persónlig sambond og staðseting kunnu ávirka kommunal innkeyp, og at útboðsgrundarlagið ikki er nóg gjøgnumskygt og javnbjóðis.

Í svarinum frá 3. november vísir landsstýrismaðurin á vandan fyri tungari fyrisiting og løgfrøðiligum byrðum. Hann leggur eisini dent á kommunala sjálvræðið.

Fíggjarmálaráðið og Gjaldstovan ætla harumframt at bjóða kommununum ráðgeving og samstarv um innkeyp.

Kappingareftirlitið tekur undir við tilgongdini og metir, at hon kann bøta um gjøgnumskygnið og kappingina uttan somu fyrisitingarligu byrðu sum lógarfestar reglur.