Til samans 18.135 hotell eru nú við í rættarmálinum. Tað eru 68 prosent fleiri enn í juli, tá ið 10.783 hotell høvdu teknað seg, skrivar danski vinnufelagsskapurin HORESTA.

Málið snýr seg um prístreytir, sum Booking.com nýtti í tíðarskeiðinum 2004–2024. Treytirnar avmarkaðu møguleikarnar hjá hotellunum at bjóða lægri prísir um aðrar sølurásir, eisini á egnum heimasíðum.

Sambært Stichting Hotel Claims Alliance, sum stendur fyri málinum, kann samlaða endurgjaldskravið verða fleiri milliardir evrur umframt rentur.

Rættarmálið er reist móti Booking Holdings, móðurfelagnum hjá Booking.com, og verður viðgjørt í Amsterdam. Millum luttakararnar eru 184 donsk hotell.

Maria Olafsson, politiskur stjóri í HORESTA, sigur, at stóra undirtøkan vísir, at hotellini vilja hava javnbjóðis kappingartreytir og størri frælsi at reka sítt virksemi.

Evropeiski vinnufelagsskapurin HOTREC og fleiri enn 30 landsfeløg stuðla málinum. Fyrsti rættarfundurin væntast at verða í 2027. Enn er óvist, nær endalig avgerð fellur.