Við árslok 2025 vóru tað bara fýra lond í heiminum, har arbeiðsloysið var lægri enn í Føroyum.

Londini vóru Katar (0,2%), Kambodja (0,3%), Niger (0,4%) og Tailand (0,8%). Í Føroyum liggur arbeiðsloysið um eitt prosent.

Tað skrivar ALS í seinastu ársfrágreiðingini. Men Arbeiðsloysisskipanin leggur afturat, at kanska er tað so, at arbeiðsloysið í Føroyum er tað lægsta í øllum heiminum yvirhøvur, tí londini omanfyri kunnu í veruleikanum illa samanberast við Føroyar.

Føroyar hava 12 ár á rað havt lægsta arbeiðsloysið í Europa. Danmark hevði næstlægsta arbeiðsloysið við trimum prosentum – tríggjar ferðir tað føroyska.