Niðurlendski felagsskapurin BNLI sigur, at Klaksvíkar Havn hevur givið skipinum NMC Protector boð um at fara úr havnini í seinasta lagi 15. oktober.

Tað upplýsir BNLI – Byzantine National Lifeboat Institution – í tíðindaskrivi til VP.

Sambært felagsskapinum kemur fráboðanin eftir, at ein ósemja við KJ um upptøku og arbeiði upp á skipið er loyst.

BNLI finst nú eisini hvassliga at avgerðini hjá Klaksvíkar Havn. Felagsskapurin sigur, at nóg mikið av bryggjuplássi er í havnini, og heldur tað vera ótrygt at krevja, at skipið verður flutt, nú heystið og verri veður standa fyri framman.

– Vit fara undir ongum umstøðum at seta trygdina hjá skipi og manning í vanda fyri at halda eina tilgjørda tíðarfreist, sigur Nicolaos Khovrin Komnenos, umboðsmaður fyri NMC Protector og formaður í BNLI.

BNLI er ein niðurlendskt skrásettur felagsskapur, sum lýsir NMC Protector sum eitt skip til leiting og bjarging. Felagsskapurin hevur eisini gjørt vart við seg við átøkum móti grindadrápi í Føroyum.

Talan er fyribils bert um lýsingina hjá BNLI av málinum. VP hevur biðið Klaksvíkar Havn um eina viðmerking til fráboðanina og grundgevingina fyri, at skipið skal fara úr havnini.