Danska stjórnin ætlar spara hjá dómstólunum fyri at hækka játtanirnar hjá politinum og ákæruvaldinum.

Men tað er ikki fallið í góða jørð hjá dómstólunum.

Í einum hoyringsskrivi siga umboð fyri allar býrættirnar í Danmark, at tað er eitt vánaligt hugskot.

Í lógaruppskotinum verður sagt, at dómstólarnir oftani eru eitt "seinkandi element", og politikararnir vilja tí geva politinum loyvi til loyniliga at lurta eftir eitt nú telefonsamrøðum hjá fólki, sum eru undir illgruna fyri eitt hvørt revsivert, í 8 vikur ístaðin fyri fýra sum í dag er galdandi, og krevja bankaupplýsingar frá privatum fyritøkum. 

- Tað er eitt sera álvarsamt inntriv í rættartrygdina, og tað vekir stúran, tá dómstólarnir verða lýstir sum eitt "seinkandi element". Tað er ikki oftani, at vit orða okkum so hvast, siga dómstólarnir millum annað í hoyringsskrivinum, skrivar Politiken.