Knapt triði hvør veljari hevði valt Fólkaflokkin um val var nú.

Tað vísir nýggj kanning, sum Portalurin hevur latið gera.

Nærum fimtihvør hevði sett x við Sambandsflokkin, og tað er eitt sindur minni enn á valinum seinast.

Tjóðveldi hevur eina lítla framgongd og Javnaðarflokkurin stendur enn til at gera eitt rakval í mun til seinasta løgtingsval. Hann stendur til at fáa einans 15% av atkvøðunum, um val var í dag.

Hjá teimum smáu flokkunum á tingið er støðan tann, at Framsókn hevur framgongd, meðan Miðflokkurin minkar.

Kanningin varð gjørd dagin fyri at løgmaður kunngjørdi sínar ætlanir um sparingar í miðfyrisitingini.