Í einum sjónbandi við heitinum “Stå fast på jeres islamiske identitet og bær den med stolthed” sigur Hizb ut-Tahrir við muslimsk ung, at tað at vera muslimur er nakað, tey skulu vera errin av og ongantíð biðja um umbering fyri. Sjónbandið er partur av einum átaki, sum vendir sær til muslimskar næmingar á donskum studentaskúlum.

Felagsskapurin ávarar samstundis tey ungu ímóti tí sosiala og mentanarliga trýstinum, sum tey kunnu møta í studentaskúlanum, millum annað viðvíkjandi veitslum, alkoholi, parlagi og normum fyri, hvussu ung liva saman.

Danski útlendinga- og integratiónsráðharrin Morten Bødskov hevur svarað sera hvassliga aftur. Hann lýsir sjónbandið sum “kamufleraða islamiska ekstremismu” og heldur, at Hizb ut-Tahrir roynir at brúka muslimsk ung til at fáa ávirkan á donsku ungdómsútbúgvingarnar.

Eisini umboð fyri donsku studentaskúlarnar hava funnist at boðskapinum hjá Hizb ut-Tahrir. Kritikkurin er serliga, at felagsskapurin setur ein muslimskan samleika og vanligt danskt skúlalív upp sum mótsetningar. Skúlafólk og næmingaumboð hava hinvegin ført fram, at næmingar væl kunnu vera trúgvandi, siga nei til alkohol og samstundis vera ein partur av sosiala lívinum á skúlanum.

Málið rakar inn í eitt nógv størri kjak í Danmark um integratión. Spurningurin er ikki bara, um ung skulu drekka alkohol ella fara til veitslur, men hvør eigur at seta mørkini fyri, hvussu tey ungu liva.

Ein konservativur muslimur hevur sama rætt sum onnur til at velja lívshátt og trúgv. Men kritikarar av Hizb ut-Tahrir spyrja, nær religiøs vegleiðing broytist til sosialt eftirlit, har onnur siga teimum ungu, hvønn tey kunnu vera saman við og hvussu tey eiga at liva.

Hizb ut-Tahrir vendir argumentinum við og sigur, at tað heldur er danska samfelagið, sum trýstir muslimar til at leggja sín religiøsa samleika til viks.

Tí er nýggja átakið eisini eitt stríð um sjálva tulkingina av integratión: Er væl eydnað integratión, at øll liva meira ella minni eins – ella at fólk við heilt ymiskum lívshátti kunnu vera partur av sama felagsskapi?

^{Faktaboks: Hizb ut-Tahrir}

^{Hvat er tað: Ein altjóða islamistisk politisk rørsla, stovnað í Miðeystri í 1953.}

^{Málið: Felagsskapurin arbeiðir fyri einum islamiskum kalifati og tekur frástøðu frá vesturlendskum fólkaræði sum politiskari fyrimynd.}

^{Danmark: Hizb ut-Tahrir hevur virkað í Danmark í fleiri áratíggju. Tað hevur fleiri ferðir verið politiskt kjak um at banna felagsskapinum. Ríkisadvokaturin hevur áður mett, at grundarlag ikki var fyri at krevja felagsskapin upploystan eftir grundlógini.}

^{Nýtt politiskt kjak: Fólkatingið viðgjørdi aftur í 2026 eitt uppskot um at fáa myndugleikarnar at byrja eina sak við tí endamáli at fáa Hizb ut-Tahrir upploystan.}

^{Onnur lond: Bretland bannaði Hizb ut-Tahrir sum yvirgangsfelagsskap í januar 2024.}