Útlánini hjá føroysku bankunum til húsarhald vóru 8,7 prosent størri í juli enn somu tíð í fjør.

Húsarhaldini læna fyrst og fremst til bústaðir, og bankarnir siga seg hava merkt størri eftirspurning eftir fígging í øðrum ársfjórðingi. Teir vænta eisini, at eftirspurningurin fer at vaksa í triðja ársfjórðingi, upplýsir Føroya Váðaráð.

Ráðið nevnir eisini, at rentuhækkingar kunnu raka húsarhaldini. Samstundis hevur dýrari olja fingið inflatiónina at vaksa aftur í øðrum ársfjórðingi.

- Hægri prísir og rentur minka um keypiorkuna hjá húsarhaldunum, og ráðið metir, at tað kann tálma nýtsluna komandi tíðina, sigur ráðið millum annað í seinastu frágreiðingini.