Verður ein mús sædd umborð á einum flogfari er bert eitt at gera, og tað er at lenda sum skjótast. Og júst hetta hendi hjá SAS í gjár, tá eitt flogfar hjá skandinaviska flogfelagnum var á veg úr Stokhólmi til Malaga í Spania.

Flogfarið var statt yvir Belgia, tá eitt av ferðafólkunum boðaði frá, at viðkomandi helt seg hava sæð eina mús umborð. Og bara illgruni um gnagdýr er nóg mikið til at flogfarið noyðist at lenda, tað váttar Alexandra Lindgren Kaoukji, samskiftisfólk hjá SAS fyri Aftonbladet.

Ferðafólkini vórðu síðani send avstað aftur við einum øðrum flogfarið, váttar hon.

Tað er óvist, um nøkur mús varð funnin umborð.