Uttanríkis- og Fiskimálaráðið: Bárður á Steig Nielsen, landsstýrismaður í uttanríkis- og fiskivinnumálum, setti mánadagin altjóða fiskivinnuráðstevnuna IIFET 2026. Ráðstevnan, sum verður hildin annaðhvørt ár, er hesa vikuna í Norðurlandahúsinum í Tórshavn. IIFET stendur fyri International Institute of Fisheries Economics and Trade.

Hetta er fyrstu ferð, at IIFET-ráðstevnan verður hildin í Føroyum. Umleið 250 granskarar, umboð fyri vinnu, myndugleikar og altjóða felagsskapir luttaka á ráðstevnuni, sum Fróðskaparsetur Føroya er vertur fyri.

Ráðstevnan byrjaði við einum almennum fundi um framtíðar umsiting av fiskivinnuni. Á fundinum viðgjørdu føroyskir og útlendskir serfrøðingar, hvussu vísindi, búskapur, politikkur og vinnulig atlit kunnu spæla saman, tá fiskivinnan verður umsitin.

Í setanarrøðuni vísti landsstýrismaðurin á stóra týdningin, sum fiskivinna og alivinna hava fyri føroyska búskapin og samfelagið.

- Málið er at skapa størst møguligt virði úr okkara sjófeingi og samstundis tryggja, at tilfeingið verður umsitið burðardygt. Góðar politiskar avgerðir um fiskivinnuna mugu byggja á gransking, men vit hava eisini tørv á vitan og royndum hjá teimum, sum virka í vinnuni, segði Bárður á Steig Nielsen, landsstýrismaður í uttanríkis- og fiskivinnumálum.