At hava brúk fyri einum sertilboði merkir ikki, at tú hevur minni rætt til fakliga menning, trivnað og góðar lærarar. Øll børn hava uppiborið bestu fortreytir fyri at læra og mennast.

Tað kann ikki vera rætt at vit góðtaka, at einasti serskúlin í Føroyum ikki hevur neyðuga fígging fyri at raðfesta eitt nøktandi skúlatilboð til børnini. 

Fáa ikki røttu normering
Summi børn hava brúk fyri, at tað er 1 vaksin til 2 børn, men tað ber ikki til við verandi játtan. Skúlaleiðslan skal fyrihalda seg til játtanina til skúlan. Børnini hava einki krav uppá at játtanin fylgir tørvinum, og tí er tað eingin trygd fyri, at skúlabørnini fáa røttu normering 

Eitt dømi: Í summum skúlaflokkum er tað 1 vaksin til 4-5 børn,  hóast summi hava brúk fyri, at tað er 1 vaksin til 2 børn. 

Samgongan veit av hesum
Sirið Stenberg setti landsstýrismanninum ein munnligan fyrispurning um nøktandi skúlatilboð, á Løgtingi tann 27 august.

Landsstýrismaðurin upplýsti tá, at Skúlin á Trøðni tørvar 4 størv, svarandi til 2,4 milliónir kr. árliga afturat fyri at veita skúlabørnunum nøktandi skúlatilboð. 

Hetta góðtaka vit ikki 
Sirið Stenberg gjørdi landsstýrismanninum greitt, at um hann ikki kom við einari eykajáttan beinanvegin, so kom Tjóðveldi við uppskotinum.

Nú skriva vit 22 september, og enn er einki nýtt ella framgongd í málinum. Tað kunnu vit bert skilja sum, at samgongan heldur tað vera í lagi, at skúlabørnini á Skúlanum á Trøðni, ikki fáa nøktandi skúlatilboð.

Vónandi verður ein meiriluti fyri at tryggja børnunum nøktandi skúlatilboð
Vit í Tjóðveldi hava lagt uppskot fram um, at Løgtingið játtar 800.000 kr. nú, so skúlin kann hava nøktandi játtan í hesum játtarárinum. Fyri komandi fíggjarár má játtanin verða framskrivað við 2,4 mió. kr til fult virksemi.

Vit kunnu ikki sum samfelag góðtaka, at børn við serligum avbjóðingum eru verri stillað enn onnur børn. Børn við serligum avbjóðingum hava allan rætt og krav uppá at vera javnsett við aðrar skúlanæmingar.

Við vón um at øll standa saman um nøktandi skúlatilboð á Trøðni

Tjóðveldi