Nike arbeiðir við einum nýggjum ættarliði av renniskóm, sum kann tillaga seg undir rennitúrinum. Sambært patentinum skal skógvurin við hjálp frá elektronikki, sensorum, luft og vætu kunna broyta trýstið undir iljunum eftir tørvinum hjá rennaranum.

Ein motorur og ein lítil pumpa skulu millum annað kunna gera skógvin bleytari ella stinnari, meðan sensorar kunnu skráseta rørslur, ferð og kraftina í fótinum.

Talan er um eitt stig víðari enn teir sokallaðu superskógvarnir, sum longu hava kollvelt renningina. Teir brúka millum annað karbonplátur og serstakt skum fyri at geva betri orkuúrtøku og lægri mótstøðu.

Men tað er ikki vist, at reglurnar innan ítróttina fara at loyva nýggju tøknini.

Amelie Werkhausen, sum er serfrøðingur á økinum, og starvast a Norges Idrettshøgskole, metir, at ein slíkur skógvur neyvan verður loyvdur í kappingum, tí hann kann geva rennaranum ein óveruligan fyrimun.

Hóast tað, kann marknaðurin verða stórur. Serliga tey sum renna fyri at orka betur, mosjonistar, væntast at vera áhugaðir, eisini sjálvt um prísurin verður oman fyri 5.000 krónur, skrivar NRK.