Alt bendir á stjórnarskifti í Svøríki. Tvær exit poll-kanningar geva reyðgrøna andstøðuvonginum greiðan meiriluta eftir ríkisdagsvalið í dag.

Kanningin hjá SVT gevur Javnaðarflokkinum og stuðulsflokkunum 51,3 prosent, meðan stjórnarflokkarnir og Svøríkisdemokratarnir fáa 46,8 prosent. Tað svarar til umleið 183 tinglimir móti 166, skrivar SVT.

Ein exit poll hjá TV4 vísir somuleiðis 51,3 prosent til reyðgrøna vongin. Javnaðarflokkurin hjá Magdalenu Andersson verður størstur við 28,4 prosentum. Moderaterna fáa 17,5 prosent og Svøríkisdemokratarnir 18,5 prosent.

Liberalerna, sum vóru í vanda fyri at detta úr ríkisdegnum, fáa sambært kanningini 5 prosent og klára sostatt fýraprosentmarkið.

Verða tølini váttað, kann Magdalena Andersson taka við sum forsætisráðharri eftir Ulf Kristersson.

Talan er tó enn um fyribils tøl.