Føroysk skip kunnu kortini ikki fiska tær 4.000 tonsini av svartkjafti, sum eru sett av til vinnuligar fiskiroyndir, í íslendskum sjógvi.

Í kunngerðini frá 26. august stóð, at kvotan kundi fiskast í føroyskum sjógvi, íslendskum sjógvi og í NEAFC-skipanarøkinum.

Men longu 8. september varð kunngerðin broytt. Orðini „í íslendskum sjógvi“ eru nú strikað. Royndarkvotan kann sostatt bara fiskast í føroyskum sjógvi og í NEAFC-skipanarøkinum.

Talan er um 4.000 tons, sum kunnu latast persónum, feløgum ella eigarum av fiskiførum til vinnuligar fiskiroyndir. Dentur verður lagdur á menning og nýskapan.

Umsóknarfreistin er framvegis 25. september 2026 klokkan 12.

Nýggja kunngerðin kemur í gildi í dag.