Yvir 100 sethús eru brend í grund í einum stórum eldi í Drammen í Noregi, og meira enn 400 fólk eru flutt burtur úr økinum. Fult tamarhald er enn ikki á eldinum, sum kyknaði fríggjadagin.

Tað skrivar NRK.

Sløkkiliðið hevur avmarkað eldin nærindis bústaðarøkinum í Krokstadelva, men hann hevur breitt seg út í skógin. Turt veður, smalar gøtur og nógvur gróður hava gjørt sløkkiarbeiðið sera trupult.

Á einum tíðindafundi sum hevur verið nú seinnapartin varð sløkkiliðsleiðarin Calle Varfjell sjónliga rørdur, tá hann varð spurdur um sítt egna hús, sum eisini er brent niður.

– Tað er hart. Vit og nógvir aðrir brandmenn eru eisini rakt og sera troytt, segði hann við tárum í eygunum.

Trý fólk eru løstað, men sambært løgregluni er eingin saknaður. Einki bendir á, at eldurin varð ásettur, og løgreglan vísir aftur gitingum um yvirgang.

Minst 12 sløkkilið og fleiri tyrlur hava tikið lut í arbeiðinum.

Myndugleikarnir lýsa eldin sum ein av ringastu eldsbrunum í nýggjari norskari søgu.