Tað fall ikki í góða jørð, tá tað herfyri kom fram, at USA hevur í hyggju at byggja eina miðstøð fyri amerikanskar ríkisborgarar í Afrika sum eru ella møguliga eru smittaðir við ebola. Har kunnu teir so vera í viðgerð og sóttarhaldi, áðrenn tey sleppa heim til USA.

Men tað er bara tað, at illa smittandi og sera deyðiliga ebola sóttin er higartil ongantíð staðfest í Kenya, og tí eru fólk har alt annað enn fegin um ætlanirnar hjá USA. 

Fakfólk hava kallað averðina hjá USA bæði óetiska og kanska eisini ólógliga, men ein roynd hjá hægstarætti í Kenya at steðga ætlanunum er sett til viks av forsetanum, William Ruto. Hann sigur, at talan er um eina avtalu millum vinir, og Kenya vil sjálvandi hjálpa USA tá á stendur.

- Slappið bara av, vit eru ábyrgdarfull og vita hvat vit gera, hevur hann sagt.

Sóttarhaldið skal vera á Laikipia hernaðarstøðini sum liggur einar tríggjar tímar í bili frá høvuðsstaðnum, Nairobi.

Ebola ger serliga um seg í DR Congo, har hevur WHO higartil skrásett 381 tilburðir og 64 sum eru deyð.

Sagt verður av heilsumyndugleikunum í norðurlondum, at lítil vandi er fyri smittu her.