Svar frá Jacob Vestergaard, landsstýrismanni, upp á § 52a-fyrispurning nr. 52-31/2026 frá Bjarna Kárason Petersen, løgtingsmanni, rúmdarvirksemi í Føroyum

Fyrispurningurin er soljóðandi:  
1. Hvat lógargrundarlag er fyri rúmdarvirksemi í føroyskum øki í síni heild?

2. Hvat lógargrundarlag er í Føroyum fyri at staðseta og reka jarðbundið infrakervi, ið hevur til endamáls at samskifta við eindir, ið eru í ringrás kring knøttin?

3. Hvat lógargrundarlag er í Føroyum fyri at staðseta og reka jarðbundið infrakervi, ið hevur til endamáls at senda lutir í ringrás kring knøttin?

4. Sær landsstýrismaðurin møguleikar í eini møguligari rúmdarvinnu í Føroyum?

5. Hvat ætlar landsstýrismaðurin at gera fyri at eggja til eina føroyska rúmdarvinnu?

Svarað verður undir einum: 
Rúmdarvirksemi er ikki regulerað í føroyskari lóggávu. Økið verður mett at fella undir málsøkið flogferðsla og er tískil ikki yvirtikið málsøki, sambært § 1, stk. 2, nr. 4 í løgtingslóg um ræði á málum og málsøkjum.

Í Danmark er málsøkið skipað við lov nr. 409 af 11. maj 2016 om aktiviteter i det ydre rum.

Sambært § 23 kann lógin setast í gildi fyri Føroyar við kongligari fyriskipan við teimum frávikum, ið tey føroysku viðurskiftini gera neyðug. Rúmdarvirksemi hevur tó fylt lítið í politiska kjakinum í Føroyum seinastu árini, sum helst er orsøk til, at danska lógin frá 2016 ikki er sett í gildi fyri Føroyar.

Tað er tó ein sannroynd, at okkara grannalond hava økt um virksemið á hesum økinum seinastu árini. Tað er tískil vert at kanna møguleikarnar fyri rúmdarvirksemi av ymiskum slag í Føroyum.  

Av tí at talan er um danskt málsøki, verður annars víst til Ríkisumboðið.  

Vinnumálaráðið, 10. sept. 2026 
Jacob Vestergaard 
landsstýrismaður