Árið í fjør hilnaðist betur hjá fiskavirkinum Tavuni í Leirvík enn leiðslan hevði væntað.

Sambært roknskapinum, sum júst er komin, lógu stívliga 12 milliónir krónur eftir á botnlinjuni í fjør - tað mesta nakrantíð og gott og væl ein millión krónur meira enn árið framman undan.

Góða úrslitið tekur støði í einum bruttovinningi uppá góðar 45 mió kr - góðar tríggjar milliónir krónur meira enn í 2024.

Leiðslan sigur í frágreiðingini, at úrslitið var betri enn væntað og hon væntar eitt líka gott úrslit í ár.

Tilsamans 85 fólk høvdu sína dagligu gongd á virkinum í fjør, tað er sjey fleiri enn árið fyri. Tað sást eisini aftur í lønarútgjaldingunum, sum vóru 28,5 mió kr, hálv onnur millión krónur meira enn fyrraárið.

Fíggjarstøðan javnvigaði við smáum 80 mió kr harav vóru smáar 64 mió kr eginpeningur.

Joen Magnus Rasmussen er stjóri.