Hóttanir frá Donald Trump, forseta, hava eftir øllum at døma gjørt, at bæði Danmark og onnur Natolond nú brúka lutfalsliga meira enn USA uppá at styrkja verjuna.

Tá Mark Rutte, aðalskrivari, hósdagin legði fram ársfrágreiðingina hjá Nato bleiv greitt, at samanumtikið brúka tey 32 Nato londini nú 20% meira til verjuendamál, enn tey gjørdu fyri einum ári síðani.

- Tað hevði ongantíð hent uttan Trump, segði Mark Rutte.

Jyllandsposturin skrivar, at Danmark í fjør brúkti 3,34% av bruttotjóðarúrtøkuni til verjuendamál. USA brúkti í fjør 3,19% av síni bruttotjóðarúrtøku til verjuna.

2025 var fyrsta árið har øll Nato londini náddu málinum frá 2014 at brúka minst 2% av BTÚ til verjuna. Nýggja málið er at brúka minst 3,5% til verjuendamál. Bert trý lond hava nátt tí málinum, tað eru Pólland, Litava og Letland.