Samhugi fyri Palestina sýnir Emmy-virðislønta heimildarfilmin ”Kids Under Fire” í Perluni kl. 19 leygarkvøldið. Akuttlæknin Mimi Syed, sum hevur tilknýti til Føroyar, er við í filminum, sum viðger upplivingar hjá heilsustarvsfólki í Gaza seinastu árini. Í filminum greiða Mimi og onnur eygnavitnir, heilsustarvsfólk úr USA, frá tí, sum tey hava eygleitt og upplivað í Gaza.

Mimi Syed er sjálv stødd í Føroyum í løtuni og tók stig til at fáa filmin sýndan alment her. Í filminum fylgja vit eisini søguni hjá fýra ára gomlu smágentuni Mira Al-Darini, sum varð skotin í høvdið, og sum Mimi Syed var við til at bjarga. Mira er fyri stuttum komin til Mexico sum flóttafólk, og ætlanin er at savna inn pening á tiltakinum til hennara viðgerð.

- Vit fara at deila eitt leinki og QR kotu á myndunum, so tú kanst stuðla, sama um tú fært møtt ella ikki - stuðla við tí, tú kanst. Alt ger mun, siga tey í felagsskapinum Samhugi fyri Palestina.

Í Perluni verður ein lítil biti frá Grønu matveitingini og drekka at fáa.

Dr. Mimi Syed verður til staðar og fer at greiða nærri frá sínum upplivingum aftaná filmin.

Tiltakið er ókeypis og øll eru vælkomin.