Uttanríkis- og Fiskimálaráðið: Í sambandi við formansskapin hjá Føroyum og Danmark í Norðurlendska ráðharraráðnum vóru Føroyar, 9. og 10. juni, vertir fyri árliga fundinum hjá Norðurlendska ráðharraráðnum fyri fiskivinnu, alivinnu, landbúnað, matvørur og skógbrúk (MR-FJLS). Fundurin varð leiddur av Bárði á Steig Nielsen, landsstýrismanni í uttanríkis- og fiskivinnumálum, og Jacob Vestergaard, landsstýrismanni í vinnumálum.

Havið var reyði tráðurin á fundinum, har ráðharrarnir viðgjørdu felags avbjóðingar og møguleikar innan matvøruframleiðslu, tilbúgving, veitingartrygd og burðardygga gagnnýtslu av náttúrutilfeingi. Londini vóru samd um, hvussu týdningarmikið tað er, at Norðurlond samstarva um felags loysnir í eini tíð við vaksandi óvissu og nýggjum avbjóðingum.

Á fundinum varð umrøtt, hvat kann gerast fyri at styrkja sjálvbjargni og tilbúgving á matvøruøkinum. Stjórin á Heilsufrøðiligu starvsstovuni, Bárður Enni, hevði eina framløgu um føroysku royndirnar á hesum øki. Samtykt varð at seta á stovn eitt norðurlendskt samstarv um matvøruveitingartrygd millum matvørumyndugleikarnar í londunum.

Eisini greiddi Havstovan frá sínum mátingum av havstreymunum í Atlantshavinum (AMOC), og hvussu broytingar í havstreymunum kunnu ávirka fiskastovnar, veðurlag og samfeløg í okkara parti av heiminum.

Bárður á Steig Nielsen nýtti eisini høvið at gera vart við føroyska ynskið um fullan limaskap í Norðurlendska Ráðharraráðnum. Hann vísti á arbeiðið við at dagføra Helsingforssáttmálan og heitti á limalondini um at stuðla Føroyum í hesum máli.