Vápnahvíldin í Miðeystri hongur í morgun í einum klønum tráði, eftir at tingingarnar ímillum USA og Iran í Islamabad eru slitnaðar og amerikanska sendinevndin er farin heimaftur.

Áðrenn tey stungu í sekkin segði amerikanski varaforsetin, J.D. Vance, at eftir at hava samráðst í 21 tímar var greitt, at partarnir standa ov langt frá hvørjum øðrum til, at nøkur semja kann finnast.

- Og tað er nógv verri fyri Iran, enn tað er fyri USA, legði hann afturat.

Hann segði eisini, at Iran er ikki til reiðar at veita vissu fyri, at landið ikki fer at gera kjarnorkuvápn. Og tað er eitt ófrávíkiligt krav frá USA.

Iran sigur hinvegin, at fleiri av krøvunum frá USA vóru órímulig. Iran heldur, at tað er fyrst og frems USA sum hevur ábyrgdin av, at ongin semja spurdist burturúr.

Óvist er tí nú hvat hendir við vápnahvíldini, sum skuldi vara í tvær vikur ímeðan partarnir samráddust.