Amerikanski uttanríkisráðharrin Marco Rubio dróg í røðu síni til trygdarráðstevnuna í München í land í mun til dundurtaluna sum varaforsetin J.D. Vance helt á somu ráðstevnu í fjør, har hesin millum annað tosaði um hóttanina sum kom innanífrá.

Marco Rubio legði dent á tað sum USA og Europa hava í felag. Hann tosaði um hjálpina sum Europa hevði veitt USA tá á stóð og hann tosaði nógv um søguligu bondini ímillum báðar heimspartarnar.

- Okkara lagna er og fer altíð at vera samantvinnað við tykkara. So tá vit eru ósamd við Europa og kanska tykjast eitt sindur bondsk tá vit havast at Europa, kemst tað av, at USA stúrir fyri framtíðini hjá Europa. Vit vilja hava ein sterkan samstarvspartnara, ikki ein veikan. Ein sum veit hvat tað er, vit stríðast fyri, tá vit fara í kríggj, segði amerikanski uttanríkisráðharrin millum annað í síni røðu til ráðstevnuna.