Ein trani, ella grátrani, hevur verið at sæð í Suðuroynni í nakrar dagar.

Anja H. Magnussen hevur sæð hann fleiri ferðir og tikið myndir/videobrot av honum, sum VP við loyvi endurgevur her á síðuni.

Anja fortelur, at hon sá hann í Akrabergi 1. mai og so aftur í dag í Sumba, har videobrotið er frá.

Keldur á netinum vilja vera við, at trani hevur verið sera sjaldsamur gestur í Føroyum. Fram til 2009 vóru 12 skrásetingar, tær flestu frá mai ella juni. Eftir tað hevur hann ikki verið á listanum yvir serliga sjaldsamar fuglar.

Størsti stovnurin er at finna í Russlandi, Finnlandi og Svøríki, sigur Birdlife. Teir halda mest til í vátlendi.