Ársúrslitið hjá Faroe Ship var nærum 54 milliónir krónur skeiva vegin í fjør. Tað skal samanberast við hall á góðar 25 mió kr árið frammanundan. Hyggja vit at seinastu fimm-seks árini, so er hallið væl oman fyri 100 milliónir krónur.

Verður hugt nærri at tølunum, so stavar katastrofala úrslitið ikki frá minkandi sølu, tí nettosølan var áleið tann sama í fjør sum í 2024. Men framleiðslukostnaðurin, tað kundi til dømis verið olja og annað, var væl dýrari eins og úrslitið av kapitalpørtum í øðrum feløgum eisini dróg niður.

Leiðslan sigur ikki nógv í frágreiðingini til orsøkina um vánaliga úrslitið, men um framtíðina verður sagt, at úrslitið er tengt at, hvussu verður við ófriðinum í heiminum.

- Útlitini fyri 2026 taka støði í, at útlit eru fyri, at ófriðurin í heiminum kemur undir tamarhald. Vit vænta, at føroyska samfelagið kemur lutfalsliga væl ígjøgnum verandi alheims støðuna, verður sagt.

Fíggjarstøðan javnvigar við 534 mió kr og eginognin var 487 mió kr.

Steinar Eirikstoft er stjóri.