Janus Petersen skal hava roynt at snýtt tað almenna fyri yvir tvær milliónir krónur í meirvirðisgjaldi í samband við íbúðarbyggingar, og ákæruvaldið vil hava hann dømdan fongsulsrevsing umframt bót.

Tað skrivar Frihedsbrevet.

Janus Petersen fór í 2015 frá sum stjóri í Føroya Banka, hann fekk slakar 10 milliónir krónur við sær í fráfaringarløn og fór nakað seinni undir at byggja íbúðir við Karlamagnusarbreyt og Ingibjargargøtu í Havn. Tað gjørdi hann ígjøgnum tvey smápartafeløg, hann eigur, Frami og Frami bygging. Og tað eru hesi bæði feløgini sum sínamillum ikki hava havt ordan í mvg roknskapinum, meinar ákæruvaldið. 

Janus Petersen sigur við Frihedsbrevet, at talan er um eitt trætumál ímillum seg og Taks og hann hevur ikki aðrar viðmerkingar til málið.