FSF: Tað eru skjótt trý ár síðani, at 34 ára gamli Heini Vatnsdal seinast var partur av A-landsliðnum. Skaðar hava darvað miðverjanum, ið hava verið so mikið álvarsamir, at hann ikki hevur verið nóg birgur til landsliðsfótbólt hesa tíðina.

Men til venjingardystin móti San Marino komandi leygardag, verður Heini Vatnsdal millum teir 23 spælararnar, ið landsliðsvenjarin, Eyðun Klakstein hevur at ráða yvir.

– Tað er deiligt at vera við aftur, og eg gleði meg til at vera partur av hesum hópinum. Eg føli meg væl, og merki lítið og einki til tað, ið annars hevur argað, sigur Heini Vatnsdal, ið higartil er skrásettur fyri 37 A-landsdystir, við heimasíðuna hjá FSF.

Heini avloysir Andrias Edmundsson, ið hevur givið avboð. Andrias hevur spælt rættuliga nógv seinastu vikurnar, og tað hevur givið føroyinginum í Seriu A nakrar snuddir á vegnum. Og fyri at koma hesum til lívs, hevur Andrias givið avboð til dystin móti San Marino.

Venjingardysturin millum San Marino og Føroyar verður á San Marino Stadion leygardagin 28. mars klokkan 14:00.