Iran er alt annað enn nøgt við áhaldandi ísraelsku álopini á Libanon og tí sleppa at kalla ongi skip at sigla ígjøgnum Hormuz sundið, sum annars er partur av avtaluni um vápnahvíld.

Iranska tíðindastovan FARS, sum hevur tætt samband við iransku kollveltingarhirðuna, boðaði í gjár frá, at sundið fyribils er stongt aftur fyri almennari ferðslu, og á Marinetraffic sæst, at sera fá skip eru at síggja har á leiðini. Vanliga sigla yvir 100 skip gjøgnum sundið hvønn dag.

Eisini frættist frá iranskum álopum á fleiri grannalond seinasta samdøgrið. Eitt nú hevur Iran roynt at oyðileggja rørleiðingina hjá Saudi Arabia til Reyða havið. Saudi Arabia hevur brúkt hesa rørleiðingina fyri at sleppa undan at sigla oljuna gjøgnum Hormuz sundið.