Seinastu dagarnar hava smábátar biðið um hjálp óvanliga ofta, kanska hongur tað saman við góða veðrinum, góðum fiskiskapi og -prísi.

Mánadagin fór ein bátur vestanfyri at leka og maðurin umborð bað um hjálp. Ein bátur nærhendis var biðin um at sigla til bátin ið lak og liggja klárur at veita hjálp um neyðugt. Rescue Sverri kom til hjálpar, og sleipaði bátin ið lak inn á Miðvág.

Fyrradagin steðgaði ein upp norður úr Stakkinum. Vørn skrivar soleiðis um hendingina:

- Ein einsamallur maður umborða á einum tróðarabáti fekk trupuleikar við motorinum 1/2 fj norður úr Stakkinum. Rescue Vón var sendur eftir bátinum og fekk hann trygt inn til Eiðis.

Í gjár bað ein bátur staddur eystur úr Hvalnesi á Sandoynni um hjálp. Arbeiðsbáturin hjá Brimli sleipaði bátin til lands.

Og eisini í gjár sleipaði Rescue Vón ein bát, sum var staddur 9 fjórðingar úr Kallinum tá hann fekk maskintrupulleikar, til lands.

Tíðliga í morgun fekk ein smábátur trupuleikar við motorinum í ein landnyrðing úr Fugloynni. Rescue Ziska var sendur eftir honum og fekk hann trygt inn til Hvannasunds.