Skúlablaðið: Í greinarøð í fýra pørtum í Skúlablaðnum lýsir Helena Kannuberg, námslektari á Námsvísindadeildini, ymisk viðurskifti, tá talan er um bókmentaundirvísingina í føroyskum í hádeildini. Røðin byggir á kvantitativa kanning, sum gevur okkum innlit í, hvørja støðu og tign høvuðsverk í føroyskum hevur skúlaárið 2024/2025. Í Føroyum hava vit 20 skúlar við eini savnaðari hádeild. Allir hesir skúlar fingu møguleika at vera við í kanningini, sum fór fram gjøgnum telefon- og teldupostsamskifti frá 14. februar til 20. mars 2025. 16 skúlar tóku av, ið gevur eitt svarprosent á 80 prosent. Øll høvuðsøkini í landinum eru umboðað. 

Innsavnaðu dáturnar geva okkum eitt størri innlit í lærugreinina føroyskt skúlaárið 2024/25. Fyri tað fyrsta (1) vísir kanningin, at 82 % av flokkunum í hádeildini lósu eitt høvuðsverk farna skúlaár. Hetta merkir, at tað enn er siður at lesa høvuðsverk, hóast talan ikki longur er um eitt krav í námsætlanini, men heldur eitt tilmæli. Víðari vísa úrslitini, (2) at skaldsøgan er best umtókta tekstaslag at nýta sum høvuðsverk.  ≈93% av flokkunum lósu eina skaldsøgu sum høvuðsverk, ≈3,5% av flokkunum lósu leikrit, og  ≈3,5% lósu eitt stuttsøgusavn. Eitt av teimum áhugaverdastu úrslitunum er (3), at hóast upprunaføroyskar skaldsøgur fylla nógv sum høvuðsverk, so vera fáir av okkara viðurkendu skaldsøguhøvundum lisnir.

Les meira her