FSF: Málmunurin bleiv avgerandi, tá endaliga støðan í bólki B2 í EM undankappingini fyri U19 landslið við gentum skuldi gerast upp.

Kosovo vann bólkin við seks stigum, og málmuninum +8, meðan Føroyar gjørdust nummar tvey, somuleiðis við seks stigum, men við málmuninum +4.

Í fyrsta dystinum vunnu okkara gentur 3-1 á Litava. Málini gjørdu Sara Benjaminsen, sum skoraði tvey, og Kára Askham Sigurðsson. Í øðrum dysti í kappingin var heldur eingin slingur í valsinum tá Moldova varð sett ruddiliga uppá pláss. Føroyar vunnu 5-0.

Og enn einaferð var tað við einari stórspælandi Saru Benjaminsen á liðnum. Sara stóð fyri trimum av málunum, meðan Kára Askham Sigurðsson og Birita Mohr gjørdu hvør sítt.

Í triðja dystinum í kappingini gekk ikki akkurát sum ætlað, og Føroyar taptu 5-2 fyri Kosovo. Aftur vóru tað Sara Benjaminsen og Kára Askham Sigurðsson, ið skoraðu føroysku málini.

– Samanumtikið var hetta ein góð kapping. At fyrsta plássið í bólkinum glapp okkum av hondum eru vit sjálvandi hørm um, men eg haldi at okkara gentur kunnu vera ernar av tí, sum tær avrikaðu, sigur Sigtór Petersen, landsliðsvenjari.