MEGD: Sameindu tjóðir (ST) hevur útnevnt dagin í dag, 1. mars, at vera altjóða dag ímóti mismuni.
MEGD vil tí nýta høvið at varpað ljós á, at lógir og skipanir í Føroyum áhaldandi fremja mismun ímóti fólki, ið bera brek, men at tað tíbetur ber til at finna virðiligar og varandi loysnir.
Vist tú:
-
at Føroyar hava sett í gildi altjóða brekrættindasáttmálan, sum kann nýtast sum amboð at smíða javnrættindi inn í lóggávu og skipanir?
-
at Føroyar framvegis ikki hava nakra breiða lóggávu sum bannar øllum formum fyri mismuni vegna brek í føroyska samfelagnum? Til samanberingar hava grannalond okkara hava havt slíka lóggávu í áratíggju.
-
at galdandi javnstøðulóg í Føroyum bara bannar mismun vegna kyn, men ikki vegna brek, húðarlit, aldur, átrúnað ella onnur grundleggjandi atlit?
-
at tilmælini frá altjóða brekrættindanevndini til Føroya landsstýri byggja á altjóða framkomna gransking og serfrøði innan eitt nú løgfrøði, búskaparfrøði og samfelagsfrøði, og kunnu hesi vera við til at fyribyrgja og basa mismuni vegna brek?
-
at feløgini hjá fólki, ið bera brek, hava týðandi vitan og førleikar at ráðgeva politikarum og myndugleikum um, hvussu til ber at fyribyrgja og basa mismuni í eitt nú lóggávu og skipanum?
MEGD vil hervið ynskja øllum ein góðan altjóða dag ímóti mismuni.
Hetta er eitt lesarabræv. Meiningar og sjónarmið í lesarabrævinum eigur tann ið skrivað hevur. VP leggur nógv í talu- og skrivifrælsi. Tí eru allar meiningar vælkomnar, bara tær eru innanfyri karmarnar á revsilógini og fjølmiðlaetisku leiðreglunum. VP loyvir í ávísan mun dulnevndum lesarabrøvum, tá veit redaktiónin hvør hevur skrivað.
Um tú veitst okkurt, sum VP ikki veit - skriva so til vp@vp.fo
