Føroyavinurin Amir Bazak hevur sent myndir og videobrot av, hvussu hann hevur upplivað seinsta samdøgrið í Ísrael.

- Tað hevur ikki verið nógvur svøvnur, síðani álopini byrjaðu, sigur Amir, sum fyri bert fáum døgum síðani var í Føroyum og vitjaði vinmannin Ólav Frederiksen. Teir eru báðir ídnir radioamatørar.

Amir Bazak býr í lítlari bygd sum liggur við sjógvin miðskeiðis ímillum Haifa og Tel Aviv. Húsini, hann býr í, eru gomul og hava tískil onki bumbuskýli. Tí skulu tey til grannan, sum hevur nýggjari hús og bumbuskýli, sum øll nýggj hús skulu hava.

- Alarmarnir ljóða dag og nátt og vit mugu í bumbuskýlið hjá grannanum alla tíðina, sigur Amir Bazak.