Svenska fyritøkan Minesto, sum saman við SEV mennir møguleikar at fáa elorku úr sjóvarfallinum kring Føroyar, hevur nú gjørt avtalu við íslendska felagið Haf-Afl um at menna líknandi orkuverk í Íslandi eisini, serliga á fjarskotnum plássum sum ikki eru bundin í høvuðs elnetið.

Hesum boðar Minesto frá í børsfráboðan í morgun. 

Haf-Afl hevur í eina tíð gjørt kanningar av sjóvarfalli í Íslandi, júst við tí fyri eyga at vinna orku úr sjóvarfallinum. 

- Samstarvið við Minesto gevur okkum atgongd til virðismikla vitan, og nú kunnu vit fara meira ítøkiliga til verka og finna egnað støð, sigur Eyvar Örn Geirsson frá Haf-Afl í stuttari viðmerking.