Svenski kongurin, Carl Gustaf, fyllir 80 ár hósdagin.

Í svenskum útvarpi minnist hann í hesum sambandi aftur á eina hending í Sydney, Australia, í 1966, tá hann sum 20 ára gamal var undir útbúgving og sigldi til fjarskotin lond.

Á bryggjuni hitti Carl Gustaf ein heimleysan, svenskan mann, sum ikki uppdagaði, at tað var táverandi svenski krúnprinsurin, hann tosaði við.

- Hann kom bara oman á kajina at hyggja eftir svenska skipinum og fáa eina kenslu av heimlandinum, tí hann hevði búð nógv ár í útlegd. Tað var ein serlig løta fyri meg, sum eg oftani havi hugsað um síðani, tí tað var ein av fáu ferðunum, eg havi kent meg anonyman, tá eg havi verið saman við einum svia, fortelur kongur.

Carl Gustaf gjørdist kongur sum 27 ára gamal í 1973, tá abbin, Gustaf Adolf kongur, doyði. Pápi Carl Gustaf doyði í eini flogvanlukku í Danmark nógv ár frammanundan.

Carl Gustaf kongur er giftur við Silviu drotning, og tey eiga børnini Victoriu krúnprinsessu, Carl Philip prins og Madeleine prinsessu.