Umhvørvisstovan: Eingin ivi er um, at globala miðal vatnstøðan hækkar, og at hækkingin tekur dik á seg.

Hetta er greitt frá teimum mátingum og eygleiðingum, sum Millumtjóða veðurlagsráðið (IPCC), sum er mannað av heimsins leiðandi veðurlagsgranskarum, umboðandi eina ørgrynnu av ymiskum vísindagreinum, vísur á, seinast í sokallaðu AR6 -frágreiðingini.

Út frá vatnstøðumátingum, sum Danmarks Meteorologiske Institut hevur gjørt í Havn seinastu hálvu øldina og út frá fylgisveinamátingum sæst, at vatnstøðan við Føroyar er hækkað 10 cm seinastu 30 árini.

Sambært forsøgnum verður vatnstøðan í Føroyum millum 38 og 68 cm hægri í 2100, t.e. um 75 ár. Tess minni heimsins lond megna at skerja útláti av CO₂ og øðrum vakstrarhúsgassi, tess meira og skjótari hækkar vatnstøðan.  

Við støði í vitanini um hækkandi vatnstøðu er greitt, at land og kommunur mugu taka størri atlit til framtíðar veðurlagsbroytingar, tá avgerðir verða tiknar í málum um bygging og infrakervi.

Føroyskir myndugleikar hava ein týðandi leiklut í at tryggja, at Føroyar eru fyrireikaðar til framtíðar veðurlagsbroytingar.

Við at virka proaktivt og samstarva kunnu vit minka um framtíðar skaðar og tryggja eitt haldført og trygt samfelag fyri komandi ættarlið.

Tí hava stovnarnir, sum fyriskipa afturvendandi Veðurlagsdagin, orðað fylgjandi tilmæli um bygging og hækkandi vatnstøðu: 

Tilmæli 

1. At landið orðar eina landsætlan fyri tillagingar til veðurlagsbroytingar við greiðum málum og atliti m.a. fyri bygging og útbygging í økjum fram við sjónum.  

2. At avvarðandi byggimyndugleikar, bæði land og kommunur, gera eina langskygda váðameting í samband við allar byggingar og útbyggingar í økjum fram við sjónum. 

Tilmælið varð sent viðkomandi myndugleikum í farnu viku, saman við einum fylgiskjali, har greitt verður frá fakliga grundarlagnum undir tilmælinum, les her. 

Tilmælið verður lagt fram á  Veðurlagsdegnum hósdagin 23. apríl 2026. 

Les nærri um skránna og tilmelding her. 

Veðurlagsdagurin verður fyriskipaður av arbeiðsbólki mannaður av Umhvørvisstovuni, Havstovuni, Jarðfeingi, Tjóðsavninum, Landsverki, Hagstovu Føroya, FIRUM, Fróðskaparsetri Føroya og Veðurstovu Føroya.