Aldubáran: 1. mars kl. 15.00 framførir Aldubáran barna- og ungdómskonsertina “Vampýrella” í Hátúni á Tórshavnar Musikkskúla.

Barnabókin “Vampýrella” hjá Edwardi Fuglø er støði undir framførsluni, sum Páll Sólstein hevur skrivað tónleik til. Framførslan fer fram við tónleiki, frásøgufólki umframt við myndum úr bókini. Endamálið er at geva børnum eina fjølbroytta, listarliga uppliving á høgum støði, har tónleikur, frásøgn og myndlist renna saman í eina heild.

“Vampýrella” er triðja verkætlanin hjá Aldubáruni í samstarvi við Edward Fuglø og tónaskaldið Páll Sólstein. Søgan lýsir gentuna Ellu, sum er í ferð við at broytast frá barni til tannáring. Við dreymakendum myndum og tónleiki verða børnini drigin inn í søguna og uppliva broytingarnar, sum henda í einum systkinaflokki og í egnum sinni. Framførslan gevur teimum innlit í menniskjaliga menning - umframt eina livandi listarliga uppliving.

Konsertin hóskar serliga væl til børn og ung millum 9-13 ár. Framførslan byrjar klokkan 15.00 og varðar í hálvan tíma. Tiltakið er ókeypis.

Við í framførsluni verða:

Frásøgufólk: Jákup Dahl

Violin: Jón Festirstein

Viola: Angelika Hansen

Sello: Kristina Á Váli

Kontrabas: Andrias Vilhelm Poulsen

Floyta: Andrea Heindriksdóttir

Klarinet: Anna Klett

Saxofon: Kristina Thede Johansen

Horn: Páll Sólstein

Trompet: Jóhan Hentze

Guitar: Ólavur Eyðunsson Gaard

Video og teknik: Ernst Remnel

Framleitt hava:

Søga og Myndir: Edward Fuglø

Tónleikur: Páll Sólstein

Spøkilsikór: Tórshavnar Manskór

Video: Eyðbjørg S. Andreasen