Stóri drekin hjá svensku fyritøkuni Minesto, sum saman við SEV ger royndir at vinna orku úr sjóvarfallinum í Vestmannasundi, hevur nú verið í sjónum síðani mai í fjør. 

Minesto boðar í eini børsfráboðan í dag frá, at orsøkin til at Dragon 12 drekin er í sjónum enn, hóast regluligt viðlíkahald átti at verið gjørt, er, at lokali veitarin ikki hevur kunna veitt neyðugu tænasturnar.

- Umfatandi og óvæntað viðlíkahaldsarbeiði hjá lokala veitaranum ger, at Minesto ikki fær framt neyðugt og fyribyrgjandi viðlíkahald á Dragon-12 drekan. Av trygdarávum er hann tí nú í parkeringsstøðu, tí viðlíkahaldið ikki er gjørt, sigur Minesto millum annað.

- Tað er ikki kostnaðarliga forsvarligt at biðja útlendsk skip koma at gera arbeiðið, tí bíðar Minesto nú eftir lokala veitaranum, sigur Martin Edlund, stjóri, í børsfráboðanini.