Í dag var stórur dagur í Sørvági, tá nýggja sjóvinnusavnið og mentanarhúsið Messan varð alment tikin í nýtslu.

Talur og framførslur vóru á skránni, og tey vitjandi høvdu høvið at síggja húsini, sum hava kostað um 10 milliónir krónur at byggja. 

Enn er ongin settur í starv til at reka húsið, men tað verður sum skilst tað næsta sum hendir. Ætlanin er, at raksturin skal hvíla í sær sjálvum við inntøkum frá ymiskum tiltøkum og í samstarvi við ferðavinnuna á staðnum.

- Endamálið við Messuni er at varðveita gamalt træskip og gera tað til ein part av einum sjóvinnusavni, sum við orðum, myndum og framsýningum í einum livandi umhvørvi vil økja tilvitanina hjá fólki um, hvønn týdning sjógvurin hevur sum okkara lívsgrundarlag. Savnið skal lýsa okkara sjóvinnusøgu frá árabáti til nýmótans skipaflota, siga fyrireikararnir.